Eqqarsaatit Illuat pillugu oqaluttuaq

Oqartoqarsinnaavoq eqqarsaatit qaratsatsinni ineqartut, Eqqarsaatit Illuanni. Takorlooruk eqqarsaatit illumi ineerarpassualimmi najugaqartut, init angalaarfiginerini nassaarisinnaallugit.

Eqqarsaatit nassaarinissaannut sakkussat pitsaanersaat tassaavoq eqqumaffiginninneq, qaammarartitsisutut ittoq. Eqqarsaat eqqumaffigilerukku takunnilissaatit. Takunnileruillu eqqumaffiginninnerit allamut nuussinnaavat, eqqarsaallu alla eqqumaffigilerlugu.

Eqqarsaatit illuanni ineerarpassuaqarpoq. Inimi ataatsimi eqqarsaatit pissanganartut ipput, inimi allami eqqarsaatit nuanninngitsut imaluunniit kamannartut issinnaapput, inillu pingajuanni eqqarsaatit nuannersut issinnaallutik.

Eqqarsaatit illuanni eqqarsaatit takuneqarusullutik kalerrisaarisarput. Tamanna pissanganarsinnaavoq ajortumillu isumaqartariaqarnani, kisiannili aamma uuminarsinnaavoq, pingaartumik eqqarsaatit nuannerpallaanngippata, ilinnut malugeqqujuartut naalagaaniartullu.

Eqqarsaatit nuanninngitsut imaluunniit kamannartut, ilinnik malersuiinnaavissut tassaniippata, eqqarsaatit inini allaniittut pissanganartut nuannersulluunniit paasinngitsoorsinnaavatit. Tamannalu nuannerpallaanngilaq.

Eqqarsaatimmi nuannersut pissanganartullu tamarmik, Eqqarsaatit Illuanni inini allaniipput eqqumaffigineqalernissartik utaqqiinnarlugu. Immaqalu inimi tassani sakkussaqarpoq, illup iluani inini allani eqqarsaatinik iluarsaassinissamut atorsinnaasannik. Eqqarsaatit illuanni imaassinnaavoq ineerannguaqartoq, eqqarsaatinik isumassarsiorluarnartunik allannguisinnaasunillu imalimmik, imaluunniit eqqarsaatit allat inini matoqqasuniissinnaapput, eqqisisimaartitaagunik pitsaanerulluni. Taakkumi ajoqusiinnginnerussammata.

Eqqarsaatit illuanni eqqumaffiginninnerit atorlugu akulikitsumik paasisassarsiortaruit, eqqarsaatit suut eqqarsaatigerusunnerlugit aalajangernissat ajornannginnerulissaaq.