Ilaannigooq nukappiaraqarpoq eqqarsaateqaqisumik, eqqarsaataa ima oqimaatsingaaq allaat inooqataaffigineqarsinnaanngingajalluni.
Ullut ilaanni itisuumik anersaarpoq kigaatsumillu eqqarsaat oqimaatsoq qanermigut supillugu. Eqqarsaat oqimaatsoq peerummat timimini eqqissineq malugilerpaa eqqarsaatillu nalinginnaasut misigilerlugit, siusinnerusukkut nalunngisani atorsinnaasanilu.
Eqqarsaalli oqimaatsoq saannguani erfalavoq issariarnialunnguillu ingerlanerinnaanni eqqarsaataanut pulaqqippoq sunalu tamaat ulikkaarlugu, imminut takusinnaajunnaartillugu.
Misileeqqittarpoq kigaatsumik peqqissaartumillu eqqarsaat supillugu peersittarlugu - tamatigut iluaqutaalaartarpoq, sivikitsuinnarmilli.
Taamaattumik ullut ilaanni isini matungajallugit pivoq, eqqarsaatini silaannarmi saaminiittut takulluarniarlugit. Taava takorluulerpaa eqqarsaat taanna qarsunik immikkut ittunik eqqoriaqattaalerlugu, tupaallaatigaali eqqarsaat taanna nuanniitsoq, eqqortinnginniassagami illuapallattartoq. Nukappiaqqalli nalunngilaa, eqqorniaaqattaarneq tamanna pingaaruteqarlunilu ulorianartuusoq. Tamannami qarasaasiami spillertarnerminit ilisimavaa, taamaattumillu qarsuminik immikkut ittunik eqqoriaasaqattaarluni sungiusarnini ingerlatiinnarpaa, malugalugulu pikkorinninngoriartorlun.
Piffissallu ingerlanerani ima pikkorissitigaaq, eqqarsaat artornartoq eqqorsinnaanngorlugu – eqqoramiullu eqqarsaat eqqaamasaannanngorpoq. Eqqarsaat artornartoq eqqaamasat toqqorsiviannut, eqqaamasat pitsaasut pitsaanngitsullu akornannut, inuunermi ilaaginnartunut ilivaa. Ilaanni toqqorsivik ammartarpaa eqqaamasanilu alakkartertarlugit, tamannalu uloriananngilaq. Nukappiaqqallu ikinngutini ilaquttanilu piseriartaarnerminik iluatsilluartumik oqaluttuuppai, tamarmillu takusinnaavaat, nukappiaraq taanna namminiuleqqissimasoq, kiffaanngissuseqarluni nuannaarlunilu. Eqqarsaatinillu piseriartartunngorpoq oqaluttuartartunngorlunilu pitsassuaq.
