Naasut qilertat

Naasut qilertat

Silaannarsuarmi pavanersuaq, naasut nunarsuarmi tamarmeersut qilertarujussuit qeqqanni, naasup ataatsip pilutaani inuaqqat marluk issiapput. Issiapput nissutik piluttap sinaatigut nakkartillugit aalaterusaarlugit. Aappaa imusunik nujaqarpoq, aappaa qorsummik nasaqarpoq.

Qorsummik nasaleeraq aperivoq: - Sulerivugut?

- Isiginnaartugut, aappaa oqarpoq.

- Suna isiginnaarparput?

- Asanninneq.

- Qanoq ililluta?

- Aap, imusuaraq oqarpoq, naasullu qilertat qilammiittut tikkuarlugit. – Naasut tamarmik asanninnermik oqaluttuassartaqarput. Taama ittut katersorpakka.

- Sunaaffa, qorsummik nasaleeraq oqarpoq. Kinguninngualu aperaluni: - Qanoq ateqarpit?

- Soremik ateqarpunga.

- Aqqit nuannerami. Sooq taama ateqarpit?

- Tassa Eros killormut atuarlugu tassaagami Sore. Taanna Guuti Eros, ilaa nalunngilat.

- Sunaaffa. Guutiugavit?

- Aap, mikisuarannguuvungali.

- Taava sulerisarpit?

- Erosip iliuuserisartagaasa killormoortuanik pisarpunga, Guuti Sore imusuaraq oqarpoq. – Eros pisissiminik inunnut qarsunik pisittarpoq, asannilersoortillugit. Uangali asanninnermik oqaluttuat sikkertut katersortarpakka, kusanartuaannarniassammata

- Qanoq taamaaliortarpit? Qorsummik nasaleeraq aperaaq.

Sore naasorpassuit tungaannut tikkuarpoq oqarlunilu: - Naasut immikkut tamaavimmik asanninnermik oqaluttuaapput, inuit ilaannut tunngasut. Naasut uumatittarpakka, qalipaataat tipaallu tigusarpakka, sallaatsunnguamillu inuit naasumik piginnittut isumaannut supusarlugit, taamaasillutik inuit eqqaasinneqartarput asanninneq taamaallaat tunniunneqarsinnaallunilu pissarsiarineqarsinnaasoq. Asanninneq piumasaqaatigineqarsinnaananilu pisiarineqarsinnaanngilaq. Asanninneq tassaaginnarpoq qujamasuutigineqarsinnaasoq. Inuit imminnut ikiornissaannut piumassuseqalersittarpakka, asanninnerullu qanoq issusaanik tamanik nuannarinnikkusulersittarlugit.

- Iluatsittuaannarpa? Qorsummik nasaleeraq aperivoq.

- Naamik, Sore oqarpoq. – Iluatsittuaannanngilaq. Naamerluinnaq. Asanninnermik oqaluttuarpassuit toquliorlutillu toqusarput, naak ikiorneqaraluarlutik.

- Paasisinnaanngilara, qorsummik nasaleeraq oqarpoq. – Isumaannut supuseqqiinnarsinnaannginnavit? Illimmi Guutiuvutit.

- Taamaaliorusuttaraluarpunga, Sore oqarpoq. – Kisianni inuuneq taamaanngilaq. Inuppassuimmi isumaqarput, Guutip allallunniit ajornartorsiutitik aaqqissinnaagaat. Guutit suna tamaat ilisimavaat iliuuseqangaatsiarsinnaallutillu, naggaterpiaanili inuit namminneq iliuuseqartariaqarput. Ilaatigut asanninnermik oqaluttuaq unitsissallugu aamma ajorneq ajorpoq, taamaasilluni asanninnermik oqaluttuaq alla nutaaq, kusanarnerusinnaasoq inissaqalersarpoq, oqaluttuami siuliani inuit pingaarutilimmik ilikkagaqarnikuummata. Asanninnerlu nunarsuami arriitsunnguamik siaruaakkiartorpoq, piffissallu ingerlanerani ajornannginneruleriartussaaq.

Qorsummik nasaleeqqap takulerpai naasut tallimat, qummut ingerlaarlutik tungiminnukarusaartut. Taakku tassaapput naasut kusanarluinnartut, Niviarsiat. Naasut taakku imminnut qipputeqqapput, kanaartai ataatigut perlaateqqallutik. Mikisuaqqap naasut tikkuarpai aperalunilu: - Taava ilinnut qummukaannartarpat? – Sooruna uku perlaateqqasut?

Sore akivoq: - Aap – asanninnermik oqaluttuat oqitsunnguupput. Taamaammat qummukarnissaat ajornanngitsuararsuusarpoq. Taakku tallimat tassa ilaqutariit, imminnut paarisut. Taamaasilluni nunarsuarmi asanninneq annerulersarpoq. Asanninneq asanninnermik pilersitsisarpoq.

Naasut perlaassimasut Sorep tiguaai naasunullu qilertanut ilanngullugit, inissilluarlugit.

Nangillunilu oqaloqqilerpoq: - Assigiinnginneri apeqqutaavallaanngilaq. Assigiinngissuseq inuit taamaallaat isiginiagaraat. Inuit ilaat isumaqartarput, asanninnermik oqaluttuaq ataasiinnaq eqqortuusoq, sinnerilu eqqortuunngitsut. Apequttaavinngilaq, qanoq ittuunersut qanorluunniit angitiginersut. Kusanartuunissai taamaallaat pingaaruteqarpoq. Aana assersuutissaq (Sore naasumut tikkuarpoq), inuit marluk, inuusuttuaraallutilli asannilersimasut, inuunermilu ingerlanerani asajuarsimasut. Maanna utoqqalipput, marluullutillu toqusussanngulerlutik.

Sorep naasut ukisiffigai, nikorfalluni eqqarsarpasilluni. Naasorlu alla tikkuarpaa nangillunilu: - Asanninnerup naasua aana alla. Inuit marluk taakku inooqatigiissimapput, kisiannili paasisimavaat, inooqatigiiginnarunik, asanninnertik aserussasoq. Taakkununngalu pitsaanerpaassooq immikkut inuuneqalernissaq, kingornalu imminut ajunngitsumik pinissaq, asanninnerusullu pigisimasamik nuannersumik eqqaassutissatut eqqarsaatigisarnissaa. Isumaqarpunga oqaluttuap siulliup, oqaluttuallu uuma kusanassusai assigiittut. Oqaluttuat naannerit paarilluaraanni oqaluttuatut takisuutut kusanartigisinnaapput. 

- Aamma aana oqaluttuaq alla, Sore oqarpoq, naasorlu alla allatorluinnaq isikkulik tikkuarlugu. – Inuit marluk taakku oqaluttuassartaat tassaavoq, naapinnertik akunnerlu ataaseq ilagiillutik. Taava sorsuutilerput, imminnullu takoqqinngisaannarlutik. Oqaluttuassartaalli qaqugumorsuaq maaniittuassaaq.

Inuaqqat taakku sivisuumik nipaqaratik issiapput, silaannarsuaq naasullu isigalugit. Soreli oqarpoq: Naasuutikka qujamasuutigeqaakka – asanninneq tupinnartuliaavoq.

Thinkinuk

 

Poul & Louise

Lundgaard